Níu mánuðum síðar

hefur vefritarinn María

(aka Súper-María, María mozzarella, María maur, María hin

og þar fram eftir götunum)

endurfæðst á þessum stað: http://mariath.123.is/

~ : ~

Heillaóskum er hægt að koma áleiðis á áðurnefndum stað,

blóm og bleyjur afþökkuð,

en það má alltaf bjóða vefritara upp á súkkulaðiköku

hvenær sem er! ;)

~ : ~

Hlakka til að sjá ykkur sem flest á nýja staðnum

og munið að qvitta!

~ : ~

Roðagylltur blær yfir dimmum dalnum

~ : ~

Ég bý í einni menguðustu borg Evrópu.

Svifrykið er nú alveg sér kafli út af fyrir sig, en núna á ég við ljósamengun. Hvert sem gefur að líta er ljós, gervibirta, friðarsúla. Falleg hugsun en svakaleg mengun.

~ : ~

Vetur er að skella á og ég sakna stjarnanna.

Hef ekki ennþá fundið mér góðan stað til að stara upp til himins og dást að glitrandi hvolfinu. Ætla að skottast í Laugardalinn við tækifæri og kanna hvort ég finni ekki myrkvaðan stað til að laumupúkast um!

~ : ~

Nóvember mánuður hefur flogið hjá, aðventa hefst á morgun. Fer að styttast í jólin, hátíð ljóssins.

Fagna því þegar roðagylltur blærinn öðlast styrk á ný. Í desember mánuði er hugað að sjálfum sér og sínum nánustu en einnig náunganum. Tími heitra drykkja, kryddaðs bakkelsis, sveipa sig ullarteppum og flíkum, þyrla upp snjó og gleði, hlusta á kjarngóða jólatónlist og styrkja góðann málstað.

~ : ~

Fyrir jólin bendi ég á þessa síðu: Allt um jólin - Vistvernd í verki. Þarna er meðal annars stungið upp á ýmsum skemmtilegum hugmyndum að jólagjöfum.

~ : ~

Fallvalt lífið

Margar uppákomur henda mann á lífsins leið, einhverjar gerast svo snögglega að það þyrmir yfir mann en aðrar gerast hægt og rólega. Allt hefur þetta áhrif á mann en hvort áhrifin eru góð eða slæm veltur á atburðinum og manni sjálfum.

~ : ~

Haustið er gengið í garð með þvílíkum látum. Úrhelli af vatnsdropum í öllum mögulegum formum..rigningu, slyddu, snjó og hagléli. Eins er dagsbirtuna að þverra. Leið eins og kærleiksbirni á gamla Spacewagon jálknum eitt kveldið þegar myrkvað var úti. Setti háuljósin á og þetta var eins og þegar kærleiksbirnirnir hrópuðu "starið"! Þvílíkur ljósgeisli! Gamli stendur fyrir sínu..

~:~

Er að skjóta rótum í póstnúmerinu 104, umkringd heimsfrægum Íslendingum með hönnunar loftljósin sín og klessumálverkin. En ég kann betur að meta stuttar vegalengdirnar, gömul trén sem slúta yfir gönguleiðir og smávinina fagra. Nokkrar góðar vinkonur hafa lagt leið sína til mín í heimsókn en formlegt innflutningparty fer að skella á. Reikna þó með að stærðargráðan á því verði svipuð og í Flight of the Conchords þegar party var haldið í nýju íbúðinni sem var á stærð við skáp. Þröngt mega sáttir sitja!

~:~

Fór á langþráða leikhússýningu í gærkveldi: Harrý og Heimir. Sat á fremsta bekk ásamt litla bróðir Bjarna og vorum við svo nálægt sýningunni að við fengum svitann fljúgandi yfir okkur! Fimmaurabrandarar í massavís, í bland við sviðsmynd og persónusköpun sem virkjar ímyndunaraflið!
Brilliant sýning í alla staði sem fær unga jafnt sem aldna til að flissa! Karl Ágúst Úlfsson, Sigurður Sigurjónsson og Örn Árnason fara á kostum ásamt brellumeistara.

~:~

What a feeling

Ég finn yfirleitt á mér þegar tími er kominn að nýju riti..á vefinn. Ótal hugdettur hafa kviknað til lífs, velkst um, ómótaðar..svo þegar hugdetturnar eru orðnar nokkrar, vefjast þær saman í eina hug mynd sem flæðir um huga minn, berst með æðum fram í fingurgóma. Þá pára ég niður hugmyndina.
~ : ~
Ég veit að tími mili rita hjá mér er heldur langur, en það er langt síðan ég ákvað að vefritið yrði ekki notað lengur í hversdagsyfirferð (vaknaði, borðaði etc.) heldur í einstaka hugmyndir og vangaveltur ofnar saman við það helsta sem ég hef upplifað frá síðasta riti. Vonandi eru fáar, góðar færslur teknar fram yfir margar, rýrari færslur!
~ : ~
Ég hef oft fengið hrós fyrir skrif mín og teikningar, alveg frá barnæsku. Ég og bróðir minn gerðum oft heilu leikritin/myndasögurnar og fluttum fyrir foreldra okkar. Yngri systkinin mín hafa einnig verið dugleg á sama sviði og ég vona að þau haldi því áfram. Með tímanum lagðist þetta á hilluna hjá mér, þó einstaka sinnum hafi það komið fyrir að ég rifjaði upp gamla takta. Ég vona að hæfileikarnir séu enn til staðar þó þjálfun hafi engin verið!
~ : ~
Í mér blundar fagurfræðilegur rómantíker og ég hef hugsað mér að vekja hann til lífs, hvetja og hrósa. Fyrr í sumar var mér tjáð að ég byggi yfir miklum hæfileikum sem ekki væru nýttir, ég ætti eftir að eiga frábæran starfsframa og það ætti eftir að ganga upp hjá mér með bækurnar. Í huga mér var sáð hugmynd og hefur hún verið að festa rætur og vonandi vex hún og dafnar. Skrifa..teikna..mála..hvað sem skapandi er!
~ : ~
Mér var sýndur mikill heiður fyrir þó nokkru síðan þegar mjög góð vinkona mín bað mig að skrifa á myndspjöld því henni líkaði svo vel rithönd mín. Það hefur tekið mig alllangan tíma að viðurkenna fyrir sjálfri mér að rithönd mín sé falleg, ég hafi sterkan frásagnastíl, góða teiknihæfileika, sé einstök persóna og eigi allt það bezta skilið. Ég hef alltaf sett náungann fram yfir sjálfa mig, fylgst með og stutt vinkonur mínar, vini og ættingja í gegnum þeirra þroskaferli og séð þau blómstra. En gleymt mínu sjálfi. Nú er komið að mér, þótt fyrr hefði verið! Er að vinna í mínum málum og breytningar eiga sér stað og munu eiga sér stað.
~ : ~
Margt hefur gerst í sumar og margt er framundan. Í júní fór ég í frábæra jeppa/göngu/skíða/brettaferð í Hvalvatnsfjörð með mörgum einstökum einstaklingum frá Akureyri.

~ : ~
Í júlí fór ég á fjórðungsmót hestamanna á Vesturlandi. Eins og ávallt var það í góðra vina hópi!

Um miðjan júlí fór ég ásamt Gönguhópnum Handan við hæðina austur að Langasjó. Rúmlega 20 manna hópur af litríkum og frábærum einstaklingum, flestir skyldir en allir tengdir einhverjum böndum. Að þessu sinni var ég sett fararstjóri og var það mjög áhugaverð lífsreynsla! Sveinstindur, Skælingar, Gjátindur, Eldgjá og endað í Hólaskjóli. Ég labbaði því miður einungis á Sveinstind og í Skælinga sökum ótímabærrar bæklunar, en þá er bara eitthvað til að stefna að síðar meir!

~ : ~

Gæsun á Hönnu Björt í lok júlí heppnaðist frábærlega! Allt var eins og best var á kosið: komumst allar, gott veður, vel heppnuð dagskrá og æðisleg stemming! Núna erum við allar með spennuhnút í maganum og hlökkum til brúðkaupsins í lok mánaðar! En áður en sá dagur rennur upp þá er á dagskrá hjá mér Danmerkurferð. Heimsækja bedstemor og -far og fjölskyldu mömmu. Hlakka óheyrilega til!
~ : ~
Í september flyt ég síðan úr 116 póstnúmer í 104. Hef skoðað, fylgst með og borið mig eftir vinnu og húsnæði norður á Akureyri í hálft ár en ekkert markvert gerst. Get ekki setið lengur og beðið, flyt mig um set á höfuðborgarsvæðinu (og krossa putta með búferlaflutninga til Akureyrar!).
Njótið allz!
~ : ~

og á morgunn rís maísól

Já ég held að við getum öll verið sammála um það að sumarið er komið, dagatalið segir það..sumardagurinn fyrsti er liðinn..hverjum er ekki sama um smá flösu í Esjunni!

~ : ~

Flest allir búnir að kjósa samkvæmt sinni stjórnmála samvisku. Get sagt það alveg hreint út að ég kynnti mér ekki kosningaloforð og markmið flokkanna til hlítar, mér fannst vera einhver skyndibita bragur á þessu. Þannig að í tilefni dagsins, kosningadagsins, var skyndibiti í matinn hjá mér, hagkvæm skyndilausn..sem ég sá samt eftir síðar meir þegar ég tefldi við páfann. En...vona það besta varðandi meltinguna hjá stjórnmálasamstarfinu, svo útkoman verði góð fyrir Íslendinga og land.

~ : ~

Áður en við missum okkur í heilagleikanum og þjóðarstoltinu..hafið þið hlustað á Evróvisjon framlag okkar Íslendinga þetta árið, með atburði liðins veturs í huga?? Gengishrun, samskipti við Breta, Sjálfstæðisflokkur og ný ríkisstjórn..fór það kannski alveg fram hjá mér (af því að ég horfði ekki á undankeppni Söngvakeppni sjónvarps) að þarna sé verið að vísa í "ástandið í þjóðfélaginu"? Ég verð bara að viðurkenna það þá að ég vissi það ekki..
..en lagið verður bara betra fyrir vikið því ég veinaði af hlátri!! Ekki skemmir fyrir hádramatískt myndband af Íslendingi svífandi um á bleiku skýi (loftkastali útrásavíkingsins) sem sýnir kaupgleði sína með tíðum klæðaskiptum!

You say you really know me
You’re not afraid to show me
What is in your eyes
So tell me ’bout the rumors
Are they only rumors?
Are they only lies?

Falling out of a perfect dream
Coming out of the blue

Is it true? Is it true?
Is it over?
Did I throw it away?
Was it you? Was it you?
Did you tell me
You would never leave me this way?

If you really knew me
You couldn’t do this to me
You would be my friend
If one of us is lying
There’s no use in trying
No need to pretend

~ : ~

Og yfir í allt annað..mæli hikstalaust með myndinni X-men Origins: Wolverine! Í henni má finna öll lykilatriðin sem prýða þurfa góða mynd að mínu mati..skuggalega flottir leikarar (Hugh Jackman og Ryan Reynolds), smá rómantík, drama, eðal húmor, spenna, pínu viðbjóður, sjúklega flottar brellur, söguþráður og "plot" sem heldur manni gjörsamlega límdum við tjaldið! Mér leið eins og tólf ára á ný, lesandi og glápandi á hetju- og hasarefni með andvörpum og hrifningarópum..!
~ : ~

Litbrigði ljóssins

Þetta er allt að koma til. Vorið er að springa út, gengur samt erfiðlega að losa sig úr faðmi vetursins, en ég er sátt með það að faðmlagið haldist fram yfir páska..svo vetraríþrótta iðkendur geti lokið góðum vetri með stæl! Síðan má vorið koma af fullum krafti, þó það sé alveg búið að tilkynna komu sína..

Ýmislegt er að koma í ljós undan vetri..skærustu perurnar í ljósaseríunni Reykjavík hafa fölnað og jafnvel slokknað með öllu. Bauhaus og Korputorg. Frekar tómleg perustæði, sem blasa við þegar keyrt er inn í borgina frá norðri, þó Korputorg skrimti enn. Svo er spurning hvernig fer með þá „allra fegurstu“ sem enn er í smíðum..tónlistarhúsið.

Ég hef semsagt síðustu vikur frá því ég skrifaði hér síðast inn verið á ferð og flugi um landið að rifja upp gamla snjóbrettatakta. Byrjaði á Dalvík, Böggvistaðafjalli, helgina 20.-22.febrúar og hef varla stoppað síðan þá! Alveg forfallin…Akureyri-Hlíðarfjall tvær helgar í röð, Eskifjörður-Oddsskarð og að lokum Akureyri-Hlíðarfjall! Er eflaust komin vel upp í verð á árskorti, hefði verið sterkur leikur að kaupa slíkt strax. En það er bara næsta púður season, ætti að vera búin að leggja snjóbrettinu í bili..gerði það með semingi síðustu helgi. Beinhimnubólga lagast víst ekkert af sjálfu sér og eftir þrjár ferðir niður Skálafellið þarsíðasta föstudag skreið ég að bílnum og varð að viðurkenna að þetta væri eiginlega ekki hægt lengur. EN..brettið fer með norður núna á morgunn, ásamt hitapokum, legghlífum og bólgueyðandi!

Annað sem á daga mina hefur drifið: lét fjarlægja stóran blett, sem ég hef haft svo lengi sem ég man eftir mér, í hjartastað. Sporin sem þurfti að sauma voru aðeins fleiri en ég bjóst við og mér leið eins og hluti af mínu sjálf hefði verið skorið í burtu. En sárin eru gróin, eymsli horfin og með þetta fína bleika ör í hjartastað...er ekki ennþá orðið hvítt eins og hjúkkan talaði um, hlýtur að fara að koma að því!

Helgina 20.-22.mars fór ég í árshátíðarferð með félögum úr björgunarsveitinni og hressum krökkum í unglingadeildinni. Gistiaðstaða okkar var í Húsafelli, nánar tiltekið Gamla bæ, frábær kósíheit í þriggja hæða gæðahúsi..sem reyndar hallaði ískyggilega til vesturs minnir mig. Margt og mikið var gert um helgina, reynt við Langjökul en það tókst ekki betur en að eitthvað gaf sig undir einum af bílunum. Æfðum okkur þá í að festa okkur, losa úr festum, grafa snjóhús og renna sér á blöðrum. Sundlaugin í Húsafelli var tekin út, eðal grillsteikur hvert kvöld og svakafjör.
Ég flutti inn og flutti út í þessum mánuði sem er afstaðinn. Prófaði að leigja hjá vinkonu í 101 og komst að því að það var ekki fyrir mig. Þannig ég er flutt aftur heim í 116..en stefni á það að koma mér fyrir í póstnúmerinu 600..Akureyrarbæ! Maður er bara með langtímamarkmið kallinn minn..

Páskar páskar páskar..étið á ykkur gat af ýmsum kræsingum, njótið þess að gera eitthvað eða ekki neitt! Ætla að lokum að deila með ykkur málshætti sem ég fékk í páskaeggi nr.1 um daginn..það páskaegg var ekki etið af mér..“holdið er torvelt að temja“.

~ : ~

Speed of sound

Tíminn flýgur og hann náði til mín. Sá hraði sem einkennir íslenska borgarsamfélagið hefur hrifsað mig með sér í streituflauminn og því miður er ég ekki með réttan björgunarhring til að fljóta uppi eins og flestir. Mínir andlegu og líkamlegu björgunarhringir íþyngja mér og er ég það djúpt sokkin að ég hef leitað mér hjálpar. Sálfræðingur og fjarþjálfari..ekki á sama tímakaupi, en hlutverk þeirra eru svipuð: leiðbeina mér, koma mér á flot, að létta mína lund og lendar.

~ : ~

Það gerist allt svo hratt nú til dags. Tæknin gerir okkur kleift að hafa samskipti við aðra á ljóshraða og margt getur gerst í krafti síma- eða tölvupóstsamskipta. Ógrynnin öll af málum eru afgreidd á nokkrum mínútum sem í fyrndinni tók nokkra daga jafnvel vikur að ganga frá..fór allt eftir því hvernig viðraði. Bréfasamskipti, landpóstur, blekpennar og vel ígrundað málfar. Tölvupóstur, háhraða nettenging, lyklaborð og innsláttavillur. Veit alveg hvort heillar mig meira þessa dagana þegar ég er viðkvæm fyrir öllu álagi og dramatíkin í mér að gera mig geðveika.

~ : ~

Ég vil sól, ég vil bragða á sólskininu...get ekki beðið eftir sumrinu!
Eftir Noregsferð mína fyrir stuttu, þar sem ég átti góðar stundir með vinkonum, góðri frænku minni og hennar fjölskyldu, kom ég heim með sólskin í flösku: SANA-SOL!! Um leið og ég opnaði flöskuna við heimkomu barst mér að vitum kunnuglegur ilmur og æskuminningar flæddu fram. Ekki annað hægt en að brosa Sólheimaglotti eftir fyrstu skeiðina af heiðgulum veigunum! Nú hefur þessi drykkur bæst í fæðubótarefnisrútínuna á morgnana og mér líður alveg eins og krakkanum framan á flöskunni.

~ : ~
Skíðahelgi framundan, Dalvík er það heillin mín góð! Brettið klárt..nú er bara að pakka einhverjum öðrum óþarfa eins og fataplöggum, svefnpoka og þvíumlíku. Góða helgi!
~ : ~

Heilög ljósahátíð

Vil byrja á því að lofsyngja Emiliönu Torrini. Tónleikarnir voru yndislega andlega upplífgandi og hún sjálf er svo mikið krútt að mig langaði knúsa hana í döðlur og éta (hypothetically speaking)! Þarna í Háskólabíóinu, þar sem ljósin umvöfðu blíðlega tóna stórsöngkonunnar og undirspilara í laginu Beggar's prayer, byrjuðu jólin hjá mér.
~ : ~
Á föstudaginn síðasta fór ég í jólaboð á Fannafold milljón hjá útskrifaðri Kvennaskólapíu sem er ein af þeim mörgu góðu persónum sem ég hef kynnst í gegnum árin. Í jólaboðið bauð hún því fólki sem hún hefur kynnst í gegnum árin og standa henni nærri. Notaleg hátíðarstemning myndaðist í stofunni yfir spjalli og góðum veitingum í boði hússins. Þarna, sitjandi í jólahring í stofunni, birti til í huga mér að sjá slíkan vinakærleik og góðan anda.
~ : ~
Síðustu helgi stóð ég tvær dagvaktir á sjúkrabíl hér á höfuðborgarsvæðinu. Strákarnir á báðum stöðvunum tóku mér mjög vel. Ekki get ég sagt að útköllin hafi verið of mörg en ég hafði svosem nóg að gera við að svara skotum frá strákunum og svara aftur og aftur því að jú, ég hafi keypt dagatal af þeim og vinkonur mínar líka! En semsagt, ég held að ég hafi nú lært eitthvað af þessum útköllum sem ég fór í en væri alveg til í enn fleiri vaktir í starfsþjálfun!
~ : ~
Hátíð ljóssins hefur hingað til verið hreint ilmandi góð..öll fjölskyldan saman (svona að mestu), reykt læri af veturgömlu af Vestfjörðum klikkar ekki frekar en fyrri jól og ekki skemma fyrir hveitikökurnar hennar mömmu og möndlugrauturinn! Allir himinlifandi með gjafaflóðið..Bjarni litli er búin að glamra svo mikið á flunkunýja Fender gítarinn sinn að pabbi sleit streng á honum þegar hann var stilla hljóðfærið. Fríða situr enn slefandi yfir snyrtitöskunni sinni..við erum að tala um bjútíbox sem er á stærð við skjalatösku! Frikki fór sáttur á vakt í morgun með útflúraðan viskípela sem Fríða málaði á. Emma dillar sér við nýja Kanye West diskinn sinn og heldur um inneignarnótu í Púkann með sælusvip. Pabbi fór í nýju skyrtuna sína í morgun og mamma er hæstánægð með súkkulaðifjallið sem kom í ljós eftir gærkveldið! Ég er búin að kúra minn skerf undir nýja Álafossteppinu mínu og rétt skreið fram til að skrifa smá á vefritið! Margar góðar gjafir og hugsanir sem ég hef fengið og gefið þessi jól..vonandi hef ég náð að gleðja sem flesta!
Áramótakortin eiga hins vegar eftir að skila sér! Engin jólakort þetta árið, heldur áramótakort eða nýárskort!
~ : ~

Njótið hátíðanna af líkama og sál! Þýðir ekkert annað!! Þakka kærlega fyrir allt það liðna og vona að þið hafið notið þess eins og ég! Sjáumst á nýju ári..hef ekki hugsað mér að pára neitt hér inn fyrr en að þessu ári liðnu, nema eitthvað mjög svo merkilegt hafi skeð!

Inflúensa þessara síðustu daga ársins 2008: lagið Gamlársparty með Baggalút!
~ : ~

Föstudagsrúning

Tók heljarinnar rúningarnámskeið í dag..létt upphitun í morgun á leið til vinnu en fararskjótinn var þeim meira loðið er leið á daginn. Þannig þegar ég þrammaði út af vinnustaðnum kl.17 á gúmmístövlonum og dúnaranum þá blasti við mér hvítt hrúgald. Eftir þó nokkrar ryskingar við dýrið tókst mér að opna bílstjórahurðina, svissa á kvikindu og botna miðstöðina. Því næst bretti ég niður ermar, lúffaði mig og tók fram sköfuna um leið og ég greip í eyrað á loðna ferlíkinu og hóf að skafa.
Hvítar flyksur gengu í allar áttir á meðan ég snyrti kóreska rolluna (semsagt ekki Corolla). Það murraði lágt í henni og greina mátti garnagaulið berast innan frá (Villi Vill á fóninum). Ég gaut augunum á handbragð annarra rúningarmanna og sá ekki betur en að öll fagmannleg vinnubrögð væru farinn fjandans til í jólastressinu. Tætingslega rúnar rollurnar höktu um stræti borgarinnar með þykka ull á hryggnum. Þessi óvönduðu vinnubrögð eiga eftir að koma þeim í koll, tautaði ég, og í sama mund og ég hristi höfuðið keyrði dauðadæmdur maður rolluna sína utan í eina bláa og snoðaði hliðina. Þarna hefði hann betur tekið sér tíma í að skafa allann skrokkinn á sinni.
Það er dýrt spaug að snoða annarra manna rollur þannig að undan blæði!

~ : ~

EMT-B, sjúkraflutningsprófin yfirstaðinn. Fékk að vita að ég hefði staðist skömmu eftir próftökuna, fékk handaskak upp á það. En ég bíð ennþá eftir staðfestum einkunnum frá Sjúkraflutningaskólanum og umsögn. Helgina 20.-21.des er síðan starfsþjálfun á tveimur stöðvum höfuðborgarsvæðisins.

Um þessa helgi: reyna að ösla jólaösina í Kringlunni á ókristilegum tíma með systrum, slappa af og fyllast andlegri vellíðan á tónleikum Emilíönu Torrini, skreyta piparkökur, pakka jólagjöfum og sinna öðrum hátíðarverkum. Ef það heldur áfram að kyngja snjó þá verður snjóbrettið dregið fram og hugað að brettaferð á næstunni.

~ : ~

Keyrið varlega þegar svona færð er og í guðanna bænum..ekkert hálfkák með sköfuna!!
~ : ~

Be careful what you wish for..

Hún móðir mín góð átti afmæli í gær, tugirnir orðnir fimm hjá henni. Fékk meira að segja almennilega klausu í laugardagsmogganum af því tilefni! Við fjölskyldan, samtals sjö manns, fórum út að borða á Nítjándu, jólabrunch. Rosa fínt og ekki frásögur færandi nema það að það var komið færandi hendi í lok veisluborðhalds, þjónn með svaka tertu. Ég var búin að biðja um, fyrir fram, hvort þeir gætu ekki laumað einni spes sneið að mömmu en nei..heila bombu komu þeir með, í lok máltíðar þegar allir voru á blístrinu! Sæll..hún var svo fallega skreytt með ávöxtum og herlegheitum að við píndum í okkur smá sneið en síðan fengum við að taka restina með heim. Það er enn afgangur inn í ísskáp!

En já..mamma fékk ósk uppfyllta á afmælisdaginn sinn, en hún er alveg miður sín yfir því hvernig hún rættist. Þannig er það að mamma er björgunarsveitarmaður af líf og sál og hún óskaði sér þess að hún fengi útkall á afmælisdaginn. Og viti menn, um kveldið þegar fjölskyldan var rétt búin að hlamma sér fyrir framan skjáinn og Mamma mia mynddiskur á leiðinni í tækið kemur útkall. Leit að týndum einstaklingi. Nú, sólarhring síðar, er einstaklingurinn því miður ekki enn fundinn, sem er hræðilegt, og ekki það útkall sem mamma óskaði eftir. Afmælisbarnið er núna á leiðinni heim af vettvangi, til að hvílast í ca. 7 tíma, áður en hún fer aftur í leit á morgun. Allur mannskapur er dauðþreyttur og persónulega er ég úrvinda. Kalt inn að beini eftir vægast sagt nístandi kalda næturleit og síðan ekki jafn kalda, en kalda engu að síður, dagleit. Var búin að finna eitt ansi gott lýsingarorð yfir leitarskilyrði þarna á svæðinu en búin að steingleyma því..en eitt er víst að hendurnar mínar koma til með að líða fyrir frostið eitthvað út vikuna. Í þokkabót náði ég að týna einum vettlingi, sem var mér mjög kær og ekki ódýr. En já..leit heldur áfram á morgun, ég gerði mitt besta um helgina en ætla í vinnu á morgun og síðan sinna öðru sem átti að sinna um helgina. Ég þarf m.a. að læra fyrir sjúkraflutningapróf sem eru næstu helgi. Ætlaði að vera svo dugleg að sinna hinu og þessu, en síðan var ég bara dugleg að gera allt annað um helgina.

En nú er komin tími á að klæða sig úr þessum fatalögum sem ég hef verið í síðasta sólarhringinn, gefa tönnum kærkomna burstun (ekki beint forgangsatriði á vettvangi) og hringa mig undir mína eigin sæng og reyna að fá upp einhvern svefnhöfga og yl...

Guð gefi að einstaklingurinn finnist á morgunn.

Svartur húmor blómstrar þessa dagana..

..góssentíð hjá Spaugstofu, Baggalút og fleirum:

...

Nýtt í bíó

...

...

Árið 2012

Gömlu dagana gefðu mér,

þá gat ég verið einn með þér,

nú tæknin geggjuð orðin er

gömlu dagana gefðu mér.

...
Mig dreymdi að væri komið árið 2012

þeir tunglið höfðu malbikað og steypt í hólf og gólf.

Já veröldin var skrýtin það var allt orðið breytt

því vélar unnu störfin og enginn gerði neitt.

...

Og ekki hafði neitt að gera útvarpsstjóri vor,

því yfirmaður hans var lítill vasa transistor.

Og þingmennirnir okkar voru ei með fulle femm,

því forsætisráðherrann var gamall IBM.

~ : ~

Gömlu dagana.....já það er margt að rætast úr þessu gamla lagi, nema kannski framkvæmdir á tunglinu! Svartsýnar spár um djúpsteikta "le crèpes" Íslendinga en hver veit nema þetta verði ekkert mál, bara eins og hvert annað skammdegisþunglyndi. Síðan árið 2012 verðum við búin að slá nýtt heimsmet í jákvæðni, bjartsýni og framkvæmdagleði á ný..og jafnvel búin að malbika á tunglinu og byggja orlofshús fyrir nýju bankastjórana og ráðherra!

...

Sjibbí! Nú er hægt að "gegna" mig (ekki gúgla)! Lokaverkefnið mitt (B.Sc.) er komið inn á gegnir.is..veit ekki alveg hvað mér finnst um það að Jón útí bæ geti skoðað verkið, en ég vona að þetta sé bara ágætis rit! :þ

...

Framundan hjá mér: verkleg helgi í EMT-B náminu, stutt í fimm tuga afmæli móður minnar, prófahelgi í EMT-B náminu og starfsþjálfun síðustu helgina fyrir jól..og svo jól!

~ : ~

Bakk tú ðe past:

Deyr fé,
deyja frændur,
deyr sjálfur ið sama.
En orðstír
deyr aldregi
hveim er sér góðan getur.

Hávamál

Mæli með því að fólk lesi Hávamál ef það vill bregðast við "ástandinu" á hinn gamla og góða máta án framsóknar.

~ : ~

Ef einhverjir vilja fá útrás...án þess að leggjast í víking...þá mæli ég með eftirfarandi lesningu: Bréf ritað á reiðistigi í sorgarferli.

~ : ~

En nauðsynleg lesning er hér; "Íslendingar verða að endurheimta virðinguna." Brjóstkassi minn þandist út þegar ég renndi yfir þessa frétt og ég fylltist stolti og fortíðarljóma er ég rifjaði upp forsetatíð frú Vigdísar. Ðós vör ðe deis..hvernig væri að ryðja burt öllum óþefnum sem ræður ríkjum hér á landi og hefja okkur upp til vegs og virðingar á ný með Vigdísi á ráðastólum..á ný?

~ : ~

My man:

Gerðu það íslenska ríkisstjórn, hlustaðu á það sem þessi spámaður hefur að segja og förum að hans ráðum sem stolt þjóð!

Robert Z. Aliber - Gætum hæglega sleppt IMF láni!

Einfeldni:

Mennirnir eiga tvo vængi, sem hefja þá til flugs yfir jarðneska hluti: Þessir vængir eru sakleysið og einfeldnin.
(De imitatione Christi eða Eftirlíking Krists).

Þessar málsgreinar sem hafa birst hér efst í hverju riti eru teknar úr lítilli bók sem var þýdd árið 1925, en var rituð mun fyrr af C.Wagner, og ber heitið Manndáð. Ekki hef ég gerst svo fræg að lesa þessa litlu fræðslubók um lífið en í upphafi hvers kafla er að finna þessar málsgreinar, teknar héðan og þaðan. Þær heilla mig, mjög svo. Sérstaklega sú fyrsta, þar sem vísað er til fleygra orða Victor Hugo, þess merka manns.

Sakleysið og einfeldnin. Um helgina tók ég til í rýminu mínu í foreldrahúsum og fleygði meðal annars DVD mynd sem hafði legið grafin einhvers staðar, falin. Þessa mynd keypti ég alveg óvart, ruglaði henni saman við einhverja aðra mynd sem ég hafði heyrt vel látið af. Ég hef sjaldan fyllst jafn miklum óhug af kvikmynda áhorfi eins og þegar ég setti þessa á fóninn. 8 mm heitir umrædd mynd og ég hef aldrei lokið við að horfa á þennan viðbjóð. Við það að henda henni í ruslið létti mér að einhverju leyti en helst hefði ég vilja brenna hana.

Ég vil halda í sakleysið eins og ég get, þess vegna er ég ekki æstur aðdáandi hryllingsmynda eða annarra myndgerða sem kalla á adrenalín veinandi viðbrögð. Ég geri mér fulla grein fyrir því að lífið er ekki tyggjóbleikur bómullarhnoðri en það er óþarfi að sletta fram því harðasta og ógeðfelldasta sem fyrir finnst uppá daglegt líf. Ég vil geta flogið, sama þótt lendingin verði hörð...þá get ég a.m.k. sagt að ég hafi flogið, sem er meira en sumir geta sagt um sína ævi.

Inflúensa mín þessa dagana er ekki sú líkamlega inflúensa sem herjar á þjóðina heldur tónlist Ray LaMontagne. Eftir að doksi komst að þeirri niðurstöðu að ég væri með heiftarlega vöðvaþreytu og vott af millirifjagigt mælti hann með eftirfarandi (auk þess að skrifa uppá gigtarlyf..seðillinn er enn óhreyfður): ekkert stress, meðalhreyfing, halda hita á efri hluta líkama og nuddi.
Gulldrengurinn Ray veifar burtu öllu stressi sem umkringir mig, meðalhreyfing mín er badminton, göngutúrar, klifur og nú ætla ég að prófa jóga..anti-stress hreyfing og auk þess sjálfstyrkjandi.

Nú er ég búin að vera leyniljóska í næstum mánuð og ég veit ekki ennþá hvernig ég kann við mig. Er ekki gjörn á að lita hárið en ákvað á afmælisdaginn að myrkja hárið: brúnt, með vott af rauðum blæ. Held að minn saklausi ljósi háralitur komi alltaf til með að hafa vinninginn!

Jæja, framundan er ný vinnuvika, eða skólavika hjá öðrum! Njótið..
~ : ~

Stjórnvöldin kalla og verð að gegna þeim..:

Það þarf ekki að aumka mig, yðar hátign. Ég dey, meðan ég er að gera skyldu mína.
En þér eruð aumkunarverður, sem berið vopn á móti þjóðhöfðingja yðar, föðurlandi yðar og eiðum.
(Dánarsvar Bayard's til ríkisstallarans frá Bourbon).

Yfirleitt þegar hinn almenni þjóðarþegn smjattar á orðinu björgunarsveit þá er hann alveg dolfallinn yfir þessu sjálfboðaliðastarfi, fara launalaust út í vonskuveður eða aðra óvissu og hætta lífi sínu eins og ég hef stundum heyrt fólk taka til orða. Allt í góðu með það en þetta er bara alls ekki rétt. Vissulega er þetta sjálfboðaliðastarf sem skiptir gríðarlega miklu máli í atburðarrás íslenska hversdagsins en eitt hef ég lært ásamt öðrum björgunarsveitarmeðlimum að við stofnum aldrei okkar eigin lífi í hættu. Svo einfalt er það. Fleiri aðilar sem sinna neyðaraðstoð vita þetta líka. Og nú, þegar mín fyrsta verklega helgi á sjúkraflutninganámskeiðinu er yfirstaðin verð ég að segja að ég er mun meðvitaðri um þessa heilögu reglu. Þú bjargar engum né aðstoðar þegar þitt eigið líf er í hættu eða þú slasast. Þú ert númer eitt, tvö og þrjú.

Fyrir mér er þetta námskeið algjör sjálfsskoðunarspegill. Ég er farin að lýsa inn í dimm skot og horfast í augu við það að ég er verð að bjarga sjálfri mér áður en ég bjarga öðrum. Yfirleitt hugsa ég frekar um aðra og rækta illa mitt sjálf, líkamlega og andlega. Á þessu verður ráðin bót, skref fyrir skref. Ef að ég hef ekki sjálfstraust hvernig get ég þá ætlast til þess að aðrir treysti mér fyrir sínu lífi, eða öðru léttvægara? Þannig að, þetta er sjálfsstyrkingarnámskeið auk þess að gera mig færari að veita neyðaraðstoð þegar hennar er þörf.

Já. Ég veit eiginlega ekki hvað ég get sagt meir..held ég fari að halla mér. Mjög svo krefjandi en frábær helgi og ég er hreint út sagt búin á því. Ætla undir feld og ná mér í endurnærandi svefn, undirbúa mig fyrir komandi vinnuviku. Fyrir þá sem vilja æfa brosvöðvana mæli ég enn og aftur með baggalutur.is og newiceland.net (baggalutur hinz Nýja Íslands)..klárlega inflúensa það sem eftir er árs, fyrir þá sem ætla ekki í flensusprautu eins og ég! Þeir hafa alla veganna áhrif á mitt líferni..fölskvalaust líferni, stefni ótrauð áfram í því!

~ : ~

Manndáð

Þeir, sem lifa, það eru þeir, sem glíma,
það eru þeir, sem í heila og hjarta
eru gagnteknir af sterkum ásetningi,
Þeir sem fyrir há örlög klifra upp á
hrjóstruga tinda,
Þeir, sem ganga hugsandi, hrifnir af
göfgu takmarki,
Hafandi sífelt fyrir augum, nótt
og nýtan dag,
Annaðhvort eitthvert heilagt starf
eða einhverja göfga ást.

Victor Hugo.

Hef sökkt mér í lestur á kennslubók í sjúkraflutninganáminu, gjörsamlega heilluð af starfsemi líkamans og ýmsum sjúkdómum sem okkur hrjá og hvernig má greina þá.
Hefur engum dottið í hug að sjúkdómsgreina Ísaland til að komast að því hvernig landinu heilsast? Tala við fósturlandsins Freyju fá að vita hvaða skoðun hún hefur á þeim lýtaaðgerðum sem hún er stanslaust sett í? Bætt örlitlu á hana, hagrætt þessum hluta líkama eða eitthvað fjarlægt...slagæðarnar stíflaðar (árnar) og skorið þvers og kruss í húðina til að við komumst leiðar okkar. Ég veit ekki með ykkur en eftir nákvæma skoðun er mín sjúkdómsgreining eftirfarandi: grænar bólur (þúfur) sem benda til óþols eða skringilegrar hormónastarfsemi, slæmur síbreytilegur krónískur hósti og óskiljanlegt tuldur (vindur), fjúkandi flasa og húðfrumur (sandfok og jarðvegseyðing), óreglulegur skjálfti (jarðskjálftar og hristingur vegna framkvæmdasprenginga), lágur blóðþrýstingur (virkjaðar ár og þurrkur), mikil aukning á grófum líkamshárum og fæðingablettum (skógrækt og sorp/híbýli) og ofsakenndar skapsveiflur yfir árið (breytt tíðarfar "v/loftslagsbreytinga"). Tekur út mikil tilfinningaflóð á 5-100 ára fresti með tilheyrandi tárum, hori og svo framvegis, sem virðist valda meira tjóni á yfirborði húðar en áður (regn/leysingaflóð).

~ : ~

Copyright: www.icelandportfolio.com 2008
~ : ~

Niðurstaða mín er því sú að líkamlegt og andlegt ástand Frónsins fagra sé bagalegt, ætti að vera mun betra...en er ekki orðið henni lífshættulegt. Hef séð mun verra ástand á öðrum fósturlöndum víða um heim.

Nú þegar lífstílsáunninn veikindi og streitusjúkdómar kreppa margann þjóðarþegninn hérlendis sem erlendis standa sjúkraflutningamenn í ströngu að sjúkdómsgreina þá veiku, án fordóma og á fagmannlegann hátt. Engin pólitísk áhrif.
En ætli land-, jarð-, umhverfis- og náttúrufræðingar og fleiri tengdar starfstéttir sem koma að stjórnun lands, umhverfis, náttúru og auðlinda kunni að greina heilsufarsástand Íslands jafn skilmerkilega, fordómalaust og án pólitískra áhrifa þegar þeir vinna landslagsgreiningu, mat á umhverfisáhrifum og marka stefnu um nýtingu auðlinda? Nei ég hélt ekki..scenophobic people (ref. Karl Benediktsson, 2007)!

BAGGALUTUR.IS og PALLI

Ég tjái mig ekki um Geir H. Haarde, kreppu, hömstrun, kaupbrjálæði, móðursýki og annað svitatitrandi hræðsluáróðurs neikvæðnis...stopp.

Þess í stað mæli ég eindregið með baggalutur.is þar er sko húmor í lagi og fast skotið oft á tíðum!

~ : ~

Og svo er það Byr, minn elskeling banki með sínar jákvæðu down-to-earth fjárhagslegu heilsu auglýsingar með Palla...ef þig langar í bíl, tölvu eða nýjan síma, safnaðu fyrir því!

Farðu í sparigallann og sparaðu!

~ : ~

Vond-mynta-á hádegi

þannig snara ég í fljótheitum fram þýðingu á því atferli sem ég stunda tvisvar í viku, á hádegi: bad-mint-on eða badminton eins og flestir kannast eflaust við. Tvisvar í viku fer ég ásamt fleiri Mannvitsbrekkum (af hinu kyninu) í badminton í TBR húsinu. Þangað flykkjast fargolfararnir á haustin þegar veðrar illa til golfvitleysunnar og hreiðra um sig með spaða í hendi í stað kylfu. Ég kann mig illa innan um þessa innrásartegund en reyni að láta það ekki á mig fá og æfa tæknina mína og fótafimi. Minn Yoda heitir Garðar en hinir karlarnir eru líka duglegir að segja mér til hvernig ég á að bera mig að í stríðinu um fluguna, hvernig árásarstellingar henta best við hvaða aðstæður og hvenær maður notar banahöggið. Hef ekki ennþá náð tökum á banahögginu og fæturnir flækjast fyrir mér því ég hugsa svo mikið. Strákarnir hafa smá forskot, búnir að vera í þessum bransa í 1-40 ár og kunna að beygja sig í hnjám í "crouching tiger" stellingunni og höggva til flugunnar eins og "deadly viper - snake style" (fyrir þau ykkar sem hafið séð Kung Fu Panda..you know what I mean)! Ég er semsagt ennþá ung og óreynd panda í þessum efnum..en þetta fer allt að koma og fljótlega verð ég jafningi þeirra! Veit ekki hvort bumban mín er jafn öflugt vopn og hjá Po í Kung Fu Panda, á eftir að prófa!

Annars er ég að horfast í augu við hræðslupúka mína þessa dagana og næstu mánuði..lífið er hverfult og ég ætla að ná stjórn á hræðslunni skref fyrir skref: Vatnshræðsla og lofthræðsla: fór á skip og fylgdist með þyrluæfingu..næst er það að taka þátt í æfingunni og láta hífa sig upp! Er að fara á sjúkraflutninga-námskeið í 2 mánuði..ég sem hef þolað illa blóð og sprautur er farin að þola blóð og mögulega sprautur í framtíðinni! Er farin að hreyfa mig mátulega mikið og ætla að auka við mig æfingar og hreyfingu þegar líður á..svo ég geti horfst í augu við nálina á vigtinni!

~ : ~

..þó þig vanti vítamín..

Ég held að þetta sé persónulegt met hjá mér..næstum 3 mánuðir án þess að skrifa færslu!
~ : ~

Það sem hefur gerst síðan síðast var ritað: ég náði prófum og fékk sæmilega einkunn fyrir lokaritgerð..0.1 fyrir neðan hana Erlu bekkjarsystir sem fékk viðurkenninguna á útskriftardaginn. Við vorum reyndar þær einu sem útskrifuðumst úr bekknum en það er frjósöm afsökun fyrir því hjá restinni af bekknum! Ég fékk vinnu hjá Mannvit sem náttúrufræðingur, er mest megnis að vinna í ArcGIS með landupplýsingar..gera greiningar og útbúa kort. Ég ásamt öðrum í Björgunarsveitinni Brák, Borgarnesi, skipulögðum leitarhesta æfingu í maí..alveg frábært. Um sjómannadagshelgina stóð ég mína vakt við tækjasýningu Björgunarsveitarinnar Kjalar á Hátíð Hafsins, Reykjavíkurhöfn. Ég tók vakt á sjúkrabíl og var kölluð friðardúfan, því engin alvarleg slys eða önnur útköll komu á meðan ég var. Ég labbaði um Reykjadal og Grænadal hjá Hveragerði, skömmu áður en Suðurlandsskjálfti 2008 reið yfir, síðan fór ég í jarðskjálfta aðstoð ásamt félögum í Bjsv. Kili. Ég og aðrir úr sveitinni fórum síðan Fimmvörðuháls með nokkra orkubolta úr Unglingadeildinni Stormur. Fór á Landsmót Hestamanna með nokkrum hressum skvísum, greindist með B12 vítamín skort þegar heim kom..fór á Hornstrandir, en gekk ekki Hornstrandir eins og til stóð..gjörsamlega engin orka til staðar! Frábær ferð samt í alla staði..yndislegt ferðafólk sem dekraði við mig og gott veður..mest allann tímann! Fór á Strandir eftir Hornstrandir..hvíldi mig ennþá meira þar, með fjölskyldunni í orlofshúsi. Náði að borða mig sadda af aðalbláberjum og sjá ca. 50-100 hvali og höfrunga á 5 dögum. Ekki amalegt. Hitti Náttúru- og Umhverfi, bekkinn minn "gamla" frá Hvanneyri, í hnallþóruveislu í Borgarfirðinum. Þvílíkt magn af myndarlegum ungabörnum! Já þau hafa svo sannarlega sinnt kalli náttúrunnar, svona 90% af bekknum eru nýbakaðar ömmur, mæður, feður eða voru að bæta í barnahóp sinn!

Ótrúlega gaman að hitta þau öll..

~ : ~
Framundan: Hálendisgæsla með félögum í Bjsv. Kili Kjalarnesi..förum inn á Kjalveg um verzlunarmannahelgina og tökum við af Bjsv. Brák Borgarnesi sem hefur verið þar á vakt í viku. Ætla að reyna að gera eitthvað gagn..eitthvað annað en slefa og hrjóta. Þrítugsafmæli hjá Höllu vinkonu! Sprautumeðferð og járntöflur vegna blóðleysis og vítamínskorts í nokkrar vikur..krossa putta um að niðurstaðan verði góð og það þýði ekki eilífðar meðferð. Áframhaldandi vinna hjá Mannvit í vetur..það er að segja ef ég verð ekki látin fjúka.

Hugsanlega að fara að leigja í bænum.

~ : ~

Vonandi orðin fullfrísk fyrir haustið og get gert allt sem ég vil..lengi lifi bjartsýnin og b12!

~ : ~

Ég vil lýsa yfir ást minni á Vestfjörðum complett..Hornstrandir eru nottla einstakt svæði..trúið mér, ég er náttúrufræðingur á lyfjum..en það er svo miklu meira en það..þar býr og þaðan kemur einstakt fólk, ég rek ættir mínar þangað! En það er svo miklu meira en það..á meðan fréttir landans eru uppfullar af vonleysi, uppsögnum, gengissveiflum og öðrum hræðsluvekjandi heilaþvotti kemur fréttatilkynning frá Vestfjörðum: ekkert atvinnuleysi á Vestfjörðum! Svona eiga fréttir að vera á tímum sem þessum..rífa fólk upp úr vol-æðinu..bjartsýni á framtíðina og jákvæður fréttaflutningur er allra meina bót.

~ : ~

Lifið heil og njótið helgar verzlunarmanna veglega..en farið varlega!